နိုင်ငံ့အကျိုးနှင့် ပြည်သူ့အကျိုးကို ဦးစားပေး၍ လုပ်ငန်းခွင်များကို အမြန်ဆုံး ဝင်ရောက် ကြရန် မေတ္တာရပ်ခံကြောင်း နိုင်ငံတော်စီမံ အုပ်ချုပ်ရေးကောင်စီ ဥက္ကဋ္ဌ ပြောကြား

Posted on

လုပ်ငန်းခွင်နှင့် ကင်းကွာနေသည့် နိုင်ငံ့ဝန်ထမ်းများ စိတ်ခံစားချက်များကို ဦးစားမပေးဘဲ နိုင်ငံ့အကျိုးနှင့် ပြည်သူ့အကျိုးကို ဦးစားပေး၍ လုပ်ငန်းခွင်များကို အမြန်ဆုံး ဝင်ရောက်ကြရန် မေတ္တာရပ်ခံကြောင်း နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောကြားသည်။

နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က နိုင်ငံတော်၏ အခြေအနေ အရပ်ရပ်အား ပြည်သူလူထုသို့ ပြောကြားသည့် မိန့်ခွန်းကို ယနေ့ (ဖေဖော်ဝါရီ ၁၁ ရက်) ညနေပိုင်းတွင် တပ်မတော်သတင်းမှန်ပြန်ကြားရေးအဖွဲ့က ထုတ်ပြန်ရာတွင် အထက်ပါအတိုင်း ပြောကြားထားခြင်း ဖြစ်သည်။

ဖွဲ့စည်းပုံအခြေခံဥပဒေ (၂ဝဝ၈ ခုနှစ်) အရ နိုင်ငံ့ဝန်ထမ်းများနှင့် ပတ်သက်၍ နိုင်ငံတော်သည် နိုင်ငံ့ ဝန်ထမ်းများ၏ လုပ်ငန်းခွင်အာမခံချက် ရရှိရေး၊ စားဝတ်နေမှု ဖူလုံရေး၊ အိမ်ထောင်ရှင် အမျိုးသမီးဝန်ထမ်းများ မီးဖွားခြင်းဆိုင်ရာ အကျိုးခံစားခွင့်ရှိရေးနှင့် အငြိမ်းစားဝန်ထမ်းများ စားဝတ်နေမှု သက်သာချောင်ချိရေးတို့အတွက် လိုအပ်သည့် ဥပဒေများ ပြဋ္ဌာန်းရမည် ဟု ပြဋ္ဌာန်းထားကြောင်း၊ နိုင်ငံ့ဝန်ထမ်းများ အတွက် ဥပဒေများ ပြဋ္ဌာန်းထားပြီး ဖြစ်ကြောင်း၊ လိုအပ်ချက်များ ရှိကောင်း ရှိနေနိုင်ကြောင်း၊ မိမိတို့အနေဖြင့် ပြန်လည်စိစစ်ပြီး နိုင်ငံ့ဝန်ထမ်းများ အကျိုးအတွက် လိုအပ်သည်များကို ထပ်မံဖြည့်ဆည်း ဆောင်ရွက်ပေးမည် ဖြစ်ကြောင်း ဗိုလ်ချုပ်မှူးကြီး မင်းအောင်လှိုင်က ပြောကြားသည်။

“ဒီနေ့အချိန်ကာလမှာ နိုင်ငံ့ဝန်ထမ်းအချို့ဟာ မသမာသူအချို့ရဲ့ သွေးထိုးလှုံ့ဆော်မှုတွေကြောင့် မိမိတို့ရဲ့ လုပ်ငန်းခွင်တာဝန်များမှာ ပျက်ကွက်နေကြပါတယ်။ နိုင်ငံတော်နဲ့ ပြည်သူလူထုအပေါ်မှာ စေတနာထား၊ တန်ဖိုးထားပြီး လုပ်ငန်းခွင်မှာ အခက်အခဲများကြားက တာဝန်ထမ်းဆောင် နေကြတဲ့ သူတွေကိုလည်း မသမာသူတွေက နည်းအမျိုးမျိုး အသုံးပြုပြီး နှောင့်ယှက်တားဆီးနေတာ တွေ့ရပါတယ်။ ကျွန်တော် မနေ့က ကြေညာချက် ထုတ်ပြန်တားဆီးတာတွေ၊ တိုက်တွန်းတာတွေ ဆောင်ရွက်ခဲ့ပါတယ်။ ထိထိရောက်ရောက် ဖြစ်စေဖို့ ဆက်လက် ဆောင်ရွက်သွားပါမယ်။ ပြည်သူလူထုအပေါ်မှာ စေတနာထား တာဝန်ကျေပွန်နေကြတဲ့ နိုင်ငံ့ဝန်ထမ်းများအနေနဲ့ မိမိတို့ တာဝန်ကို စိတ်အေးချမ်းသာစွာ ဆက်လက် ဆောင်ရွက်နိုင်ရေး လိုအပ်တာတွေလည်း ဆောင်ရွက်ပေးပါမယ်။ နိုင်ငံတော်နဲ့ ပြည်သူလူထုအပေါ်မှာ စေတနာထားပြီး သစ္စာရှိရှိ နိုင်ငံ့တာဝန်များ ထမ်းဆောင်နေကြတဲ့ နိုင်ငံ့ဝန်ထမ်းများ အားလုံးကိုလည်း အထူးကျေးဇူးတင်ရှိပါတယ်။ လုပ်ငန်းခွင်နဲ့ ကင်းကွာနေကြတဲ့ နိုင်ငံ့ဝန်ထမ်းများ အနေနဲ့လည်း မိမိတို့ရဲ့ စိတ်ခံစားချက်များကို ဦးစားမပေးဘဲ နိုင်ငံ့အကျိုး၊ ပြည်သူ့အကျိုးကို ဦးစားပေးပြီး မိမိတို့ရဲ့ လုပ်ငန်းခွင်များကို အမြန်ဆုံး ဝင်ရောက်သွားကြဖို့ မေတ္တာရပ်ခံလိုပါတယ်” ဟု နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောကြားသည်။

ထို့ပြင် နိုင်ငံ့ဝန်ထမ်းများသည် နိုင်ငံ့အကျိုး၊ ပြည်သူ့အကျိုးကို တိုက်ရိုက်သယ်ပိုးခွင့်ရရှိသူများ ဖြစ်ကြောင်း၊ နိုင်ငံတော်၏ ဥပဒေပြုရေး၊ အုပ်ချုပ်ရေးနှင့် တရားစီရင်ရေးကဏ္ဍများ ကောင်းမွန်စွာ လည်ပတ်နိုင်ရန်အတွက် အဆင့်ဆင့် တာဝန်ယူမှု၊ တာဝန်ခံမှုများဖြင့် ပြည်သူ့ကောင်းကျိုးကို လုပ်ဆောင်နေကြရသည့် ဂုဏ်ယူစရာကောင်းသူများ ဖြစ်ကြောင်း၊ အဆိုပါ ဂုဏ်သိက္ခာကို စောင့်ထိန်းကြရမှာ ဖြစ်ကြောင်း ဗိုလ်ချုပ်မှူးကြီး မင်းအောင်လှိုင် က ပြောကြားသည်။

နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်၏ မိ်န့်ခွန်းတွင် COVID-19 ကာကွယ်ဆေး ရောက်ရှိမှု အခြေအနေ၊ ရုရှား၊ တရုတ်နှင့် အိန္ဒိယနိုင်ငံတို့မှ COVID-19 ကာကွယ်ဆေးများအား မြန်မာနိုင်ငံတွင် သုံးစွဲခွင့်ပြုသွားမည့် အခြေအနေ၊ ပုဂ္ဂလိက ကာကွယ်ဆေး တင်သွင်းထိုးနှံလိုသူများ၊ တင်သွင်းလိုသူများကိုလည်း ခွင့်ပြုသွားမည့် အခြေအနေ၊ ကာကွယ်ဆေး ဆက်လက် ထိုးနှံသည့် အခြေအနေတို့ကိုလည်း ထည့်သွင်း ပြောကြားထားသည်။

crd-eleven

Leave a Reply

Your email address will not be published. Required fields are marked *